2015/04/20
Euskadiko Filmategiaren babesa jaso duen ekimen honetara gidoiak aurkezteko epea maiatzaren 8an amaituko da.
Donostiaren erretratu bat egitea, hamabi zinemagileren begiradaren bitartez. Horretan datza Kalebegiak egitasmoaren proposamena: errealizadore ospetsuek, ibilbide handiko profesionalek eta hasiberriek parte hartzen duten produkzio bat egitean. 2016an estreinatuko da, Donostia Zinemaldian. Kalebegiak proiektuak erlazio berri bat proposatzen du zinemaren eta Donostiaren artean, hiriak betidanik erakustaldiekin eta jaialdiekin izan duen erlaziotik desberdina. Ikuspegi berri horrek tokiko ekoizpen zinematografikoa sustatzea bilatzen du nagusiki, eta Larrotxene Kultur Etxea bilakatuko da proiektuaren bihotza.
Euskadiko Filmategiaren babesa jaso duen ekimen honetan, ibilbide oparoa duten hainbat zinema zuzendarik parte hartuko dute, hala nola: Julio Medem, Daniel Calparsoro, Imanol Uribe, Gracia Querejeta, Luiso Berdejo, Borja Cobeaga, Isabel Herguera, Izibene Oñederra, Asier Altuna, Telmo Esnal eta Koldo Almandoz.
Kalebegiak diziplina anitzeko proiektua da. Izan ere, Musikenek soinubandaren konposizioan parte hartuko du eta EHU/UPVko Itzulpengintza eta Interpretazio Fakultateko ikasleek egingo dituzte azpitituluak, eleaniztasuna ziurtatzeko.
Hiru zinemagile hasi-berri hautatzeko deialdia
Zinemagile ezagunekin batera, hiru hasi-berrik ere hartuko dute parte Kalebegiak proiektuan. Horiek aukeratzeko Donostia 2016 Fundazioak eta Donostia Kulturak deialdi bat zabalduko dute Kalebegiak proiektuaren barruan sartuko diren esperientzia gutxiko hiru egilek egindako hiru gidoi aukeratzeko. Gidoiak jasotzeko azken eguna maiatzaren 8a izango da.
