2016 amaierarako eta 2017 hasierarako, Euskadiko Filmategiaren programazioa proposamen erakargarriz beteta dator. Bost ardatzetan banatu ditzakegu: Donostia Kulturarekin lankidetzan, Screwball comedy-ari buruzko zikloa ekainera arte luzatuko da. Hollywoodeko lehen genero feminista izateaz gain, bere elkarrizketa bizkor eta zorrotzek, “sexuen arteko gerra”-ren bertsio urratzaile batean kokatuta, komedia amerikarraren maisulan bilakatu dituzte zenbait izenburu.
Abenduaren 1ean, Ikuska (1979-1984) bildumaren zaharberritzea ospatuko dugu, hamar Ikuska proiektatuta eta film horien zuzendarien (ahal izan duten guztien) argazki historikoa aterata. Euskaraz egindako euskal zinema industria baten alde orain dela hiru hamarkada burututako lanak aurkeztuko dituzte. Gurekin izango dira: Javier Aguirresarobe, Montxo Armendáriz, José Julián Bakedano, Juanba Berasategi, José Luis Egea, Iñaki Eizmendi, Juanmi Gutiérrez, Mirentxu Loyarte, Pedro Olea eta Imanol Uribe. Tabakalerarekin lankidetzan, urtarriletik aurrera, Straub eta Huillet heterodoxoek dozena bat emanaldi protagonizatuko dituzte. Gustukoena egitasmoa ortodoxietatik urrundutako bi zinema kritikariri zabalduko diegu: Carlos Boyero eta Begoña del Teso. Lehenak, El buscavidas –The Hustler- (Robert Rossen, 1961) aukeratu du. Bigarrenak, berriz, Melancholia (Lars von Trier, 2011). Aukeraketaren zergatiak azalduko dizkigute biek. DSS2016EUrekin lankidetzan aurten abiatutako Zinema solasaldiak egitasmoari amaiera bikaina emango diogu Costa-Gavras eta Imanol Uribe zinemagileekin. Abenduaren 10ean zinemaz solas egingo dute, eta euren zenbait filmek ere hala egiten jarraituko dute martxora arte. Beraien zinemarekiko hurbilketa beti izan da politikoa (ia ezinezkoa da hala ez izatea edozein zinemagilerentzat): ezarritako ordena zalantzan jartzen ez duten haiena ere politikoa da. Orain dela gutxi zaharberritu dituzten Costa-Gavrasen lehen bost filmak programatuko ditugu; eta Imanol Uriberen beste lau, horien artean El proceso de Burgos (1979) eta La muerte de Mikel (1983) filmen kopia berriak proiektatuko ditugu.
